Xaawo Taako oo dalka kusoo laabatay (Daawo Sawirrada)

Ciyaaryahannadii kubadda Koleyga xulka qaranka iyo kooxdii Jeenyo Xaawo sheekh Xaawo Taako ayaa maanta dalka dib ugu soo laabatay kaddib in ka badan 20 sano oo ay Dalka dibadda uga maqneed.

Gabdhihii kubadda Koleyga ee qaranka dalka iyo naadiyada kala duwan, oo ay hoggaamineysey Marwo Khadiijo Daahir oo ah Guddoomiye ku xigeenka xirirka ciyaaraha Fudud ayaa si diiran garoonka Aadan Cadde ugu soo dhoweeyey Xaawo Taako iyagoo muujiyey sida ay ugu faraxsan yihiin in mar kale ay dib u arkaan Xaawo Taako oo dalka muddo ka maqneed.

Khadiijo Daahir, Geediyo Ali, Abshiro, Faadumo Aweys, Caasho Taraafiko, Caasho dheer iyo Mulki Nuur Muudey ayaa dhammaantood ka shekeeyey malmihii wanaagsanaa ee Xaawo Taako iyo xiddigo kale oo ay iskula ciyaari jireen garoomada dalka, waxaana ay xuseen inay si weyn ugu faraxsan yihiin in halyeeyada kusoo dhoweeyaan Muqdisho Caasimadda dalka.

Xaawo Taako oo halkaa ka hadashey ayaa sheegtay in maanta ay taariikh wanaagsan u tahay in mar kale ay dalkeeda dib ugu soo laabato oo ay aragto saaxiibadeedii Kubadda Koleyga ee beri samaadkii.

“Ma garan karo sida dareenkeygu yahay waxaan ku hadlo ayaan aqoonin farxad darteed, garoonkan waxaan ka tegey isagoo sidan ka fiican, waxaana diyaar u ahay in dalka wixii aan awoodo u qabto” ayey tiri iyadoo dareenkeedu isbedeley.