Feeryahankii hore ee Horyaalka Miisaanka culus ee Dunida Mike Tyson
ayaa si kulul u beeniyay warar ay saxaafaddu faafisay oo sheegayay in
lagu sameeyay Qalliin lagu guuleystay oo looga dhigayay Dheddig/Naag.
Websiteyo badan oo u badan kuwo laga leeyahay Africa sida “SpyGhana”,
‘The Standard-Zimbabwe’, ‘Watchdog – Zambia’ iyo ‘NewsBiscuit Story’
ayaa qoray in Mike Tyson lagu sameeyay Qalliin loogu yeelay Naaso,
Xaniinyaha (Qoorahana) laga saaray, Xubinta taranka Dumarkana loo
yeelay.
“War anigu weli Nin dhameystiran ayaan ahay, mana jirto sabab aan
Dheddig isaga dhigayo” ayuu si kulul u yiri Tyson oo 46-jir ah.
“Wararkaasi markay soo baxayeen waxaan daawanayay Ciyaartii Feerka ee
u dhexeysay Pacquiao iyo Marquez Sabtidii, Wararkaasina been keliya ma
ahane waa kuwo aan la aqbali karin oo Nacasnimo ah, qofkii shaki ku
jirana waxaan leeyahay si fiican ha ii fiiriyo isagaa arkaaya in aan Nin
ahay” ayuu sii raaciyay Tyson.
Wararkaasi Tyson uu ku tilmamaay Dacaayadda ayaa qaarkood sheegayay
in Tyson lagu sameeyay qalliin qaatay 16-saacadood, taasoo markii dambe
laga dhigay Dheddig, magiciisii ahaa Tyson-na uu iska beddelay, lana
baxay Michelle.
Duulaanka saxaafaddaha Reer Galbeedku ku qaadaan Tyson ayaa ahaa kuwo
soo jireen ah tan iyo markii xidiggani uu horraantii Sagaashameeyadii
uu ku dhawaaqay in uu qaatay Diinta Islaamka, magiciisiina u beddelay
Maalik Cabdulcasiis, waxaana dhowr jeer Tyson uu soo booqday Dhulalka
Barakeysan ee Makah iyo Madiina.
_______________________________
Nagala Soo xariir emailka
newbanaadir@hotmail.com
www.newbanaadir.com
