Daawo Sawirada Dowladda Soomaaliya oo ka qayb gashay Shirka Baarlamaanada Islaamka oo Khartoum ka dhacaya

Gudoomiye ku xigeenka Koowaad ee Afhayeenka Baarlamaanka Federaalka Soomaaliya Jaylaani Nuur Iikar iyo wafdi xildhibaanno ah oo xalay soo gaaray magaalada Khartoum ee caasimadda dalka Sudan ayaa uga qeyb-galaya kulanka Siddeedaad ee Golaha Guud ee Midowga Baarlamaannada Islaamka.

Xildhibaan Ibraahim Xaaji Nuur Saleebaan (Ilka-case) oo ka mid ah wafdiga Barlamaaniga ah ayaa Saxaafadda u sheegay in wafdiga Soomaaliya ka socda uu shirka ka jeedin doono khudbad ku saabsan xaaladda uu marayo dalkeena hooyo.

‘’Wafdigan ayaa ka kooban Toban xubnood oo isugu jira mudanayaal iyo mas’uuliyin ka tirsan qeybta hab-maamuuska Baarlamaanka Federaalka Soomaaliya’’.ayuu yiri Ibraahin Xaaji Nuur Sulaymaan Ilka Case.

Shirkan ayaa ka furmaya maanta Magaalada Khartoum Dalka Sudan kaas oo soo gaba gaboobi doona ilaa 22-ka January.

Kulankii ugu dambeeyay ee Midowga Baarlamaanada Islaamka oo ay Soomaaliya xubin ka tahay ayaa lagu qabtay dalka Malaysia bishii January ee 2012.

Midowga Baarlamaannada Islaamka waxaa la dhisay sanadkii 1999 si loo xoojiyo iskaashiga ka dhaxeeya baarlamaannada dalalka Islaamka iyo sidii xal loogu heli lahaa caqabadaha haysta dalalka Islaamka ah.