(Uefa Champions League ) Hadal
heeynta ugu badan wararka Caalamka gaar ahaan kuwa Sportiga ayaa noqotay
kulanka adag ee caawa dhex maraya kooxaha waa weeyn ee The Red Devils Man Utd
Vs Los Blancos Real Madrid. Kulankaan oo ah lugtii ama is aragii 2-aad ee
koobka Champions League waxa uu ka dhici doonaa garoonka kooxda Shayaadiinta
cas cas ee Man Utd (Old Trafford).
Is araga wajigii hore oo ka soo
dhacay garoonka kooxda Real Madrid ee Santiago Bernabeu labadaan kooxood waxa
ay ku soo kala baxeen bareejo 1-1 ah waxaana caawa lagu wadaa in ay soo baxdo
tii badisa labadooda. Kooxda Real Madrid ayaa kulanka caawa la soo shir tagtay
ciyaaryahan Cristiano Ronaldo oo la xaqiijiyay in uu aad ugu nasiib badan yahay
garoonka Old Trafford maadaama garoonkaan uu yahay halkii uu ku soo caan baxay
waliba koobab fara badan ku soo qaaday intii uusan aadin dhanka kooxda Real
Madrid sanadkii 2009-kii.
Qabiirada ka faalooda ciyaaraha
Kubada cagta ayaa intooda badan waxa ay qabaan in Laacib Cristiano Ronaldo qibradiisa
iyo halka laga xiri karo uu aad ugu dheereeyo Macalinka Man Utd Mr.Sir Alex
Ferguson oo ah shaqsigii Cristiano Ronaldo soo caan bixiyay. Ciyaaryahan
Cristiano Ronaldo intii uu la joogay kooxda Man Utd wuxuu u saftay 184-kulan
kaas oo u dhaliyay 186-Gool.
Xiisaha ugu weeyn ee Ciyaartaan ayaa
dhalatay ka dib markii labo Computer oo ciyaaraha lagu saadaalin jiray waliba
ka kala dhisan dalalka Talyaaniga iyo Jarmalka ay u kala saadaaliyeen kooxda
soo bixi doonta kulanka Caawa ee koobka Champions League . Computer-ka
ciyaaraha saadaaliyo ee laga leeyahay dalka Talyaaniga ayaa sheegay kulankaan
in ay soo bixi doonto kooxda Real Madrid balse Computer-ka ciyaaraha saadaaliyo
ee laga leeyahay dalka Germany waliba Isbuucii la soo dhaafay saadaaliyay in la
tumi doono kooxda Fc Barcelona 2 kulan o xiriir ah ayaa waxa uu leeyahay
kulankaan waxaa la reebi doonaa kooxda Real Madrid waxaana sidaas koobka
Champions League ugu soo bixi doonto kooxda Manchester United.
Labadaan kooxood waxaa u safta
Laacibiinta Dunida ugu qaalisan waxaana kala wata Macalimiinta kala ah Jose
Morinho iyo Sir Alex Ferguson oo labadaba lagu sheegay in 15 daqiiqo gudaheed
ay ciyaar dhan natiijadeeda ku badali karaan .Kulankii ugu dambeeyay ee koobka
dalka Spain oo Talaadadii hore ka dhacay garoonka kooxda Fc Barcelona ee Camp
Nou kaas oo dhex maray kooxaha Fc Barcelona Vs Real Mardid (1-3) waxaa la
sheegay in uu garonka ku soo dhex dhuuntay Macalinka Man Utd Mr.Sir Alex
Ferguson oo qishayay shaxda ama Taaktikada Tababare Jose Morinho maadaama
kulankaas kooxda Real Madrid uu aad muhiim ugu ahaa waliba u soo baxeen
Fiinaalka koobka (Copa Del Rey).
Weeraryahanka Qaranka Ingiriiska iyo
kooxda Man Utd Wayne Mark Rooney oo Saxaafada la hadlayay mar la weeydiiyay in
Cristiano Ronaldo uu aad ugu wanaagsan yahay uguna nasiib badan yahay garoonka
Old Trafford ayaa waxa uu ka Qosliyay Saxaafada isaga oo yiri sidatan "
Waa sax laakiin Ragii baray garoonka Old Trafford soona gacan qabtay ayaa wali
jooga "
Dhanka kale waxaa isla caawa lagu
wadaa in ay fooda is daraan koobka Champions League kooxda Borussia Dortmund oo
heeysata horyaalka dalka Germany iyo kooxda Shakhtar Donetsk oo iyana soo
qaaday horyaalka dalka Ukraine. Labadaan kooxood ayaa kulankoodii hore waxa ay
isku macsalaameeyeen bareejo 2-2 ah waxaana soo bixi doonta tii badisaa
kulankaan.
_______________________________
Nagala Soo xariir emailka
newbanaadir@hotmail.com
www.newbanaadir.com
