Kooxda Tottenham ayaa guul muhim ah
ka gaartay Arsenal kulankii North London derby ka dib markii ay 2-1 ku
khuusiyeen ciyaar xiiso leh oo ka dhacday White Hart Lane taasoo ka saaciday
inay ku soo laabtaan kaalinta 3aad ee kala sareynta horyaalka.
Furadoo ugu fiicneyd ee ciyaarta ee
ugu horeysay waxaa heshay kooxda Arsenal markii Giroud uu si fiican u
koontaroolay kubad baas qatar ah oo uu ka helay Areta isagoo hortaagan goolka,
laakiin labalabeyntiisa ayaa keentay Vertoghen uu ku soo gaaro islamarkaana
kubada ka difaacdo.
Daqiiqadii 37aad ee ciyaartana,
Tottenham ayaa hogaanka qabatay markii ay faa’ideysteen daafac xumi soo
wajahday Arsenal iyadoo Sigurdsson uu kubad qatar ah ku quudiyay Gareth Bale
kaasoo kubada la kortagay goolhaye Szcesny islamarkaana shabaqa cusjiyay.
Waa goolkii 10aad ee Bale uu dhaliyay
sideed kulan gudaheed oo uu u ciyaaray Tottenham, waana ciyaaryahankii ugu
horeeyay ee Wales u dhashay ee 16 gool oo Premier League ah dhaliya hal xilli
ciyaareed.
Labo daqiiqo ka dibna Tottenham ayaa
labeysatay, si isku mid ah inta badan goolkoodii hore ayayna u shaqeysteen.
Scott Parker ayaa kubad u dhigay Aaron Lennon kaasoo ka faa’ideystay daafacyada
dhexe ee Arsenal oo aanba ka war qabin halka uu taagan yahay, islamarkaana waxa
uu kubada la maray goolhaye Szczesny ka hor inta uusan shabaqa faaruq ah kubada
dhex dhigin.
Waxaana qeybtii hore ee ciyaarta ay
ku soo dhamaaty 2-0 oo Tottenham ay ku hogaamineysay, islamarkaana
taageerayaasha Spurs ay ku heesayeen “Arsene Wenger, waxaan dooneynaa inaad sii
joog.”
Arsenal oo ayaa dardar ku soo gashay
qeybtii labaad iyagoo ciyaartooda wax weyn ka bedelay, waxaan ay durbadiisa soo
ceshteen gool.
Daqiiqadii 51aad ayaana Mertesacker
uu kubad madax aheyd shabaqa dhex dhigay inkastoo ay ku sii dhacday Bale.
Isagoo ciyaarta ka dhigay 2-1.
Seddex daqiiqo ka dib Arsenal ayaa ku
dhawaatay inay hesho goolka barbaraha markii Jenkinson oo weerar sooq aaday uu
karoos halis ah soo dhigay, ka hor inta aysan lugta la helin Wilshere ama
Giroud waxaa si ciriiri ah uga soo hormaray goolhaye Lloris oo isku duubay.
Daqiiqadii 59aad ayaana Bale uu
fursad dahabi ah ka qasaariyay Spurs, markii karoos fiican uu helay isagoo u
baahnaa inuu goolka ku taabto, laakiin dadaalkiisii waxa ay keentay inuu dusha
sarre mariyo kubada.
Spurs ayaa fursad kale oo qatar aheyd
iska qasaarisay ciyaarta oo 20 daqiiqo dhiman, mar kale daafaca Arsenal ayaa
isdhigtay. Lennon ayaa ka soo galay dhanka midig isagoo kubada u dhiibay
Sigurdsson oo cidlo ah, kaasoo isna kubada la maray goolhaye Szczesny halkii uu
shabaqa abaari lahaa waxa uu damcay inuu kubada u dhigo saaxiibkiis, laakiin
waxaa dhex ka qabsaday Mertesacker.
Daqiiqadii ku xigtay daafaca Arsenal
ayaa mar kale laga faa’ideystay waxaana u soo dhawaaday Defoe oo bedel ku soo
galay laakiin darbadiisa waxa ay agmartay goolka.
Daqiiqadii 74aad Gareth Bale ayaa
kubada ku heley xerada goolka, waxaan uu daaha ka qaaday kubad gantaal aheyd,
laakiin Szczesny ayaa nasiib ku lahaa inay si toos ah ugu soo beegan tahay
isagoo badbaadiyay fursadaas.
Ciyaarta oo 10 daqiiqo dhiman Ramsey
ayaa u soo dhawaaday inuu Arsenal u barbareeyo ciyaarta markii uu ka soo galay
dhanka bidix islamarkaana darbadii uu tuuray oo qof ku sii dhacday ay si
ciriiri ah ku agmartay goolka.
Dhamaadkii ciyaarta ayaana Arsenal ay
cadaadis saartay Spurs, iyadoo Podolski uu dusha sarre mariyay kubad halis
aheyd oo uu ka tuuray afka hore ee xerada goolka.
Ciyaarta ayaana ku soo dhamaatay 2-1
oo ay guusha ku raacday kooxda martida loo ahaa, taasoo ka saaciday inay ku soo
laabtay kaalinta 3aad iyagoo leh 54 dhibcood, waxaana ay 7 dhibcood ka
saramareen kooxda ay haatan ka talaabsadeen ee Arsenal oo kaalinta 5aad weli
baaqi ku ah.
Waxaana ay guuldarrada Arsenal ka
dhigeysaa in calaamad su’aal la geliyo rajadooda ay ku soo gaari karaan koobka
Champions League xilli ciyaareedka soo socda, iyadoo horyaalka ay ka harsan
tahay 10 kulan.
_______________________________
Nagala Soo xariir emailka
newbanaadir@hotmail.com
www.newbanaadir.com
