Ururka Alshabaab oo beeniyay in ay ka dambeeyeen qaraxii ka dhacay Nairobi

Abu Muscab

Xarakada Alshabaab ayaa ka hadlay qaraxii ka dhacay magaalada Nairobi ee dalka Kenya kaasoo ay ku dhinteen dad rayid ah.

Afhayeenka Alshabaab ee dhinacyada howlgalada ayaa sheegay inaysan wax lug ah ku lahayn qaraxii ka dhacay magaalada Nairobi iyo dilkii loogu geystay magaalada Garisa ciidamo Kenyan ah.

Afhayeenka howlgalada Alshabaab Cabdicasis Abu Muscab oo la hadlay wakaalada wararka ee AFP ayaa ku tilmaamay weerarada iyo qaraxa ka dhacay Kenya ay ahaayeen qaar ay ka dambeeyeen dad taageersan Alshabaab balse aysan si toos ah ugu lug lahayn ururka Alshabaab. 

“Mujahidiinta xilligan wax lug ah kuma laha weerarada ka dhacay Islii iyo Garisa balse weeraradaas waxaa ka dambeeya dad taageersan Alshabaab oo diidan dhibaatada ay ku hayaan dadka Islaamka ah dowlada Kenya,”ayuu yiri Cabdicasis Abu Muscab.

Afhayeenka howlgalada ee ururka Alshabaab ayaa ku eedeeyay dowlada Kenya inay dhibaato ku haysa dadka Muslimiinta ah ee ku nool gudaha dalka Kenya. 

Weerarkii ka dhacay Garisa iyo qaraxii ka dhacay xaafada Islii ee magaalada Nairobi ayaa dhaliyay in ciidamo Kenyan ay dad badan ku dhibaateeyaan magaalada Garisa halkaa oo ay dad badan waxyeelo u geysteen, waxaana rabshadahaa ka dhashay in uu ku gubto suuqa ugu weyn ee magaalada Garisa.

Dalka Kenya ayaa waxaa ka soconaya dadaalo lagu doonaya in lagu joojiyo rabshadaha ka dhashay qaraxii ka dhacay Nairobi iyo weerarkii lagu qaaday ciidamada Booliska magaalada Garisa. 

Xafiiska Newbanaadir 

Muqdisho - Somalia 

Nagala Soo xariir emailka 

newbanaadir@hotmail.com 

www.newbanaadir.com