Faarax Sheekh Cabduqaadir oo ah Wasiiru dowlaha xafiiska
madaxtooyada Soomaaliya,ahna qofka kaliya ee u dhow Madaxweyne Xasan Sheekh
Maxamuud ayaa la kulmay Amiirka dalka Kuwait Amir Sheikh Sabah al-Ahmad
al-Jaber al-Sabah.
Sida ay daabacday wakaaladda wararka ee Kuwait (KUNA) Faarax
Cabduqaadir ayaa la kulmay Amiir Sheikh Sabah al-Ahmad isagoo ugu warbixiyay
xaaladda dalka iyo isbaddalladii ugu dambeeyay ee ka dhacay Soomaaliya.
Dhambaal uu ka siday
Madaxweyne Xasan Sheekh Maxamuud iyo Ra’iisul Wasaare Cabdi Faarax Shirdoon
ayuu u gudbiyay amiirka, kaasoo la sheegay inuu la xiriiro xoojinta xiriirka ka
dhaxeeya labada dal. iyadoo kulankaasina ay goob joog ahaayeen mas’uuliyiin
kale oo ka tirsan dowladda Kuwait.
Faarax C/qaadir Wasiiru dowlaha xafiiska madaxtooyada ayaa
maalmahan socdaal la sheegay in lagu xoojinaayo xiriirka dalalka Islaamka iyo
Dowladda cusub ku maraya dalal Carbeed, isagoo todobaadkii hore la kulmay qaar
ka tirsan Amiirada Boqortooyada Sacuudiga.
Waxaa sidoo kale la filayaa inuu booqdo dalal ay ka mid
yihiin Qatar, Cumaan iyo kuwo kale si uu ula kulmo amiirada dalalkaasi una
gudbiyo fariin uu ka wado Madaxweynaha dalka.
_______________________________
Nagala Soo xariir emailka
newbanaadir@hotmail.com
www.newbanaadir.com
