Gaalkacyo
Magaalada Gaalkacyo waxaa ka socda shirar gooni gooni ah oo ay
yeelanayaan beelaha dagan gobolka Mudug, beelaha ayaa qaarkood ka arinsanayaan
sidii ay uga jawaabi lahaayeen kadib markii maamulkii xilka loo dhaariyey 2009
iska dhegatirey baaqyadii ay u jeedinayeen, waxaa maanta laga sugayaa in
halkaas ay ka soo baxaan bayaano kala duwan, dhanka kale Newbaadir.com ayaa ogaatey
in Malayshiyo beeleedyo diidan muddo kororsiga uu ku kacay Cabdiraxmaan Faroole
ay ku sugan yihiin duleedka Gaalkacyo halka loo yaqaan Taalo cad, waxaa wararku
sheegayaan in Maanta halkaas ay ku canshuureen Qaadka ka soodega magaalada
Gaalkacyo ee u socdey Garowe, malayshiyaadkan ayaa sheegay in ay tegayaan
magaalada Jalamee Gobolka
Nugaal halkaasna uu noqodn doono saldhigoodu.
Magaalooyinka Bacaadweyn, Burtinle iyo Galdogob ayaa la
sheegayaa in lagu dhex arkaayo gawari ay ku xiran tahay calaamado ay ku qoran
tahay Faroolow waqtigaagi waa dhamaadey.
Qardho
Magaalada Qardho waxaa maalintii shalay ka dhacay mudaahaaard
loogu magac daray SAGOOTIN waxaana ka qaybgalay qaybaha kala duwan ee bulshada,
waxaana dadkii ka qaybqaatey mudaaharaadkaas fariin u diray Madaxweynaha xilku
ka dhamaadey, farintaas ayaa ahayd in uu ka baxay ballantii dalkana aanu xoog
ku qabsan ee loo dhiibey welina ay ugu baaqayaan in uu ballantii dhawro, isla
markaana Puntland mushkilad loo horseedin.
Siyaasiga Cabdullaahi Siciid Samanter ayaa la filayaa in uu
maanta la hadlo saxaafadda isaga oo ku sugan magaalada Qardho, inkasta oo
mucaaradka ku kacsan maamulka xilku ka dhamaadey aysan lahayn gole ay ku
mideysan yihiin ayaa haddana la filayaa in waxa ugu weyn ee uu sheegaa ay
noqoneyso hadalo uu horey u sheegay oo ah in maanta wixii ka danbeeya
Cabdiraxmaan Faroole aanu ahayn Madaxweyne sharci ah.
Bosaso
Xaaladda Magaalada Bosaso ayaa ah mid degan, waxaa weli jidadka
dhooban ciidamo maalintii shalay la keeney halkaas waxaana aad ku arki kartaa
waddooyinka oo dhan iyo jidadka yar yar ee gala xaafadaha, arrintan ayaa ka
danbeysey kadib markii la sheegay in Wasiirka Amniga Hotelkiisa PANORAMA
malayshiyaad aan la garanayn ay weerar u geysteen laba habeen ka hor, weerarkan
ayaa dhabarka loo saarey Xarakada al-Shabaab ee buuraha Golis ku sugan, ma
aysan sheegan weerarkaas al-Shabaab, waxaana dadka qaarkis sheegayaan in uu
ahaa xaalad abuur wasiirka amnigu sameeyey si uu u xirto shaatiga tuutaha isla
markaana u caburiyo in dadku samayn karaan Mudaaharaad nabadgelyo oo ay ku
muujinayaan sida ay uga xun yihiin in mamulku qaban waayo doorasho,
mudaaharadkaas oo fashilmey maalintii shalay.
Dhanka kale waxaa ka socota Madaxtooyada Bosaso qaban qaabo
madaxweynaha xilku ka dhamadey Cabdiraxmaan Faroole doonayo in uu ugu
dabaaldego sanadkii afaraad maalintii la doortey, waxaa lagu wadaa in
xafladdaasi caawa ka dhacdo Madaxtooyada Bosaso.
Cadde Muuse
Madaxweynihii hore ee Puntland Gen.Cadde Muuse oo wadey dedaal
lagu xalinayo xiisadda siyaasadeed ee ka dhalatey muddo kororsiga ayaa lagu soo
waramayaa in habeenkii xalay uu gaarey magaalada Bosaso, Cadde ayaa safar ku
tegey Magaalooyinka Gaalkacyo, Garowe iyo Qardho waxaana uu kulamo la qaatey
waxgarad kala geddisan welina kama hadlin dedaalka uu wadey, mana cadda
mawqifka rasmiga ah ee isagu uu ka taagan yahay.
_______________________________
Nagala Soo xariir emailka
newbanaadir@hotmail.com
www.newbanaadir.com
