Isu soo bax balaaran oo ay ka
qeybgaleen dadweynaha ku nool degmooyinka Yaaqshiid, Wardhiigleey iyo Howlwdaag oo lagu soo dhaweeynayay
hirgilinta nalalka ku shaqeeya ileyska qoraxda ayaa xalay lagu qabtay wadada
wadnaha.
Dibadbaxayaasha oo ka kala yimid
degmooyinka Yaaqshiid, Wardhiigleey iyo Howlwadaag ayaa xalay socod ku maray
qeybo ka mid ah wadada Wadnaha gaar ahaan inta u dhaxeysa isgoyska Sanco ilaa
Howlwadaag, iyadoo wadadaasi uu maamulka
gobolka Banaadir ka hirgeliyay nalalka ku shaqeeya ileyska cadceeda.
Isu soo baxayaasha ayaa ku qeylinayay
ereyo ay kusoo dhaweeynayaan mashruuca maamulka gobolka Banaadir uu ku ifinayo
waddada wadnaha oo markii ugu horeysay in ka badan Labaatan Sano kadib la arkay
iyadoo ifeysa oo ay dadka iyo gaadiidkuba ay si baqdin la’aan ah u dhex
mushaaxayaan.
Mas’uuliyiin ka tirsan maamulka
gobolka Banaadir iyo gudoomiyayaasha degmooyinkaasi oo la hadlay dadka isu soo
baxay ayaa kula dardaarmay in ay gacan ka geystaan nabada oo ay ka hortagaan
kuwa caqabada ku ah amniga iyo dib u soo celinta bilicdii magaalada Muqdisho.
Nalalka ku shaqeeya ileyska cadceeda
ayaa hore loo geliyay wadada Maka Almukarama,
iyadoo maamulka gobolka Banaadirna uu doonayo in mashruucan lagu baahiyo
dhamaan waddooyinka magaalada Muqdisho, suuqyada iyo garoomada Isboortiga.
_______________________________
Nagala Soo xariir emailka
newbanaadir@hotmail.com
www.newbanaadir.com
