Maxkamada Magaalada Glasgow ayaa
shalay la horkeenay John Cassidy oo ah ninka jirdil u geystay oo madaxa uga
joogsaday wiil Soomaali ah oo 12 sano jira.
John Cassiday ayaa la sheegay inuu
jirdilay oo madaxa uga joogsaday wiilka Soomaali ah oo 12 sano jira kadib
markii uu cunugaasi Soomaaliga ah candhuuf uu ku tufay wadadii uu marayey.
Ninkan ayaa xiligaasi watay gaari
jidka marayey, kadibna intuu kasoo degtay gaariga oo uu baacsaday wiilkan
Soomaaliga ah jirdil xoogleh u geystay, wiilka Soomaaliga ah ayuu kadib madaxa
uga joogsaday, sida shalay maxkamada magaalada Glasgow laga horcadeeyey.
Wiilka Soomaaliga ah oo Maxkamada
yimid si uu ugu markhaati kaco ninkan jirdilka u geystay ayaan shacabka
wajigiisa la tusin maadaama uusan qaan-gaar ahayn isla markaana uu yahay 12
sano jir. Wiilkan Soomaaliga ah ayaa sidoo kale ah cunug jiran oo qaba cudurka
Kansarka ee loo yaqaan (leukaemia), xiligaasna ay u socotay daawooyin badan.
Wiilkan Soomaaliga ah oo Maxkamada ka
hadlay ayaa sheegay in xiligii weerarka lagu soo qaaday uu la socday
saaxiibadiisa isla markaana ay ka yimaadeen xarunta lagu dabaasho ee Springburn
Leisure Centre oo ku taal magaalada Glasgow. Wuxuuna sheegay in xiligaasi uu
hayey calool xanuun, wuxuuna sheegay inuu xanjo uu cunayey uu dhulka ku tufay,
kadibna uu ka war helay ninkan oo weerar kusoo qaaday.
Ninka falkan geystay ayaa ku
dhawaaqayey erayo isir naceeb ah ama cunsuriyadi ka buuxdo, sida ay sheegeen
saaxiibadii wiilkan oo iyaguna ka hadlay qaabka falkan u dhacay.
“…Aniga dhulkaan ku dhacay waana
suuxay, balse ma ogeyn wixii kale oo uu igu dhuftay…” ayuu yiri wiilkan yar ee
Soomaaliga ah, balse waxaa la sheegay in wiilkan markuu suuxay uu ninkan madaxa
uga sii joogsaday oo madaxa laad iyo feer kala dhacay wiilkaasi 12 sano jir ah.
Maxkamada magaalada Glasgow ee
Sheriff Court, ayaa sheegtay in ninka maxkamada lasoo saaray oo lagu magacaabo
John Cassidy lagu helay danbiga, isla markaana dhawaan lagu dhawaaqi doono
xukunkiisa.
Falkan isirnaceebka ah ayaa si weyn u
cabsi geliyey dadka ajaanibta ah ee ku dhaqan magaalada Glasgow ee gobalka
Scotland ee dalka UK.
Reerka Soomaaliga ah ee dhalay
wiilkan yar ayaa hada u guuray magaalada London, kadib markii uu raad xun oo
isugu jira cabsi iyo hurdo xumo uu wiilka Soomaaliga ah ka dhaxlay weerarkaasi
lagu qaaday.
_______________________________
Nagala Soo xariir emailka
newbanaadir@hotmail.com
www.newbanaadir.com
