Muqdisho(Newbanaadir.com) Shir xasaasi
oo saxaafada ay dibad joog ka ahayd una dhexeeyey madaxweynaha dowlada
Soomaaliya iyo dablamaasiyiin ka socda wadamada deeq bixiyaasha oo ka soconayey
garoonka diyaaradaha Aadan Cadde ayaa goor dhow lasoo gabagabeeyey waxaana shir
jaraa’id saxaafada u qabtay Madaxweynaha dowlada Soomaaliya Xasan Sheekh
Maxamuud oo ka warbixiyey waxyaabihii kulanka maanta looga wada hadlay
Madaxweynaha ayaa sheegay in shirkii maanta diirada lagu saaray sidii
wadamada deeq bixiyaasha ay kordhiyaan taageerada ay siiyaan dowlada
Soomaaliya.
Madaxweynaha ayaa intaa ku daray in la isku afgartay
waxyaabihii la iskula soo qaaday kulankii maanta oo ay kamid ahayd sidii loo
maareyn lahaa dhaqaalaha ay bixiyaan deeqbixiyaasha iyo sidii loo hubin lahaa
in lacagahaas ay maraan meelihii loogu tala galay isagoona sheegay in
dowlada Soomaaliya ay xiligan u baahantahay gacan siinta wadamada beesha
caalamka, waxaana kaloo kamid ah waxyaabihii kulanka maanta looga wada hadlay
sidii Soomaaliya looga taageeri lahaa dhinacyada amaanka iyo dib u dhiska dalka.
Kulanka maanta oo ay ka qeybgaleen dablamaasiyiin ka socda
wadamada America,UK , Italy ,Rorway iyo Sweden kuwaas oo kamid ah
wadamada hormuudka u ah deeqbixiyaasha caalamka ayuu sheegay madaxweyne Xasan
Sheekh Maxamuud iney ballan qaadeen iney laba jibaari doonaa taageerada ay
siiyaan Soomaaliya.
Kulanka ayaa waxaa sidoo kale maanta ka wada qeybgalay saraakiisha
dowlada Soomaaliya u qaabilsan maaliyada sida wasiirka maaliya,Madaxa Bangiga
dhexe iyo masuuliyiin kale oo ka tirsan hay’adaha maaliyada Soomaaliya waxaana
la sheegay in kulanka si weyn loogu falanqeeyey in lahubiyo lacagaha deeqaha ah
ee la siiyo dowlada Soomaaliya ineysan ka weecan halkii loogu tala galay.
Wadamada caalamka ayaa ku eedeyn jiray dowladihii kumeelgaarka
ahaa ee dalka Soo maray in shaqsiyaad ka tirsan ay lunsadeen lacagihii loogu
tala galay mashaariicda horumarinta dalka Soomaaliya waxaana muuqa in caalamku
ay ku qanceen hab dhaqanka masuuliyadeed ee dowlada cusub ee Soomaaliya.
W/Q Abdihakim Awke Tarabi (Karoone)
_______________________________
Nagala Soo xariir emailka
newbanaadir@hotmail.com
www.newbanaadir.com
